1950-70 urteen artean ehundaka emakume izan ziren urte luzez euren familia eta etxeetatik urrun, neskato modura lanean ibili zirenak. Jon Abrilen amatxi izan zen horietako bat, «etxean aditutako kontuetatik» tiraka hasi eta «bizipen horiek biltzeko tenorea» iritsita Neskatoak dokumentala grabatu du bertako emakumeen bizipenekin. Berdintasun Batzordetik aipatu dutenez, «gure inguruan artzain, baso-mutil edo arrantzale moduan joan ziren gizonezkoei buruz solastu da gehien bat, eta orain emakume hauen lana gogoratu eta errekonozitu nahi dugu, genero ikuspegi batetik». Dokumentalaren estreinaldian, Jon Abril egilea bera eta ikusentzunekoan parte hartu duten emakumeak egonen dira.
Beran ez ezik, martxoaren 12an Arantzako baskulan ere aurkeztuko dute dokumentala 19:30ean.
Martxoaren 8an, Toki Ona institutuan kontzentrazioa deitu dute, 13:00etan.
Bortzirietako Emakumeen Mendi Itzulia
Bortzirietako Oinarrizko Jendarte Zerbitzuen Mankomunitateak antolatutako Bortzirietako Emakumeen VII. Mendi Itzulia Beran eginen da martxoaren 13an. 09:00etan Mukixu zubitik aterako dira; 13:00etan elkarretaratzea leku berean eta 14:00etan bazkaria Zalainen (Prezioa: 20 euro). Izen emateko azken eguna martxoaren 10a izanen da. Horretarako, 948 635036 telefonora deitu behar da. Berako Udalak, Toki Ona kiroldegiko dutxak erabiltzeko aukera eskainiko die partehartzaileei, 13:00etatik 14.00etara.
Goldatz Emakume Feminista Taldearen Aste Morea
Bertzetik, Berdintasun Batzordetik ezagutzera eman nahi izan dute Goldatz Berako Emakume Feministak Taldeak antolatu duen programa aberasgarria, ekitaldiaz betea. «Goldatz Taldeari ongi etorria eman nahi diogu –aipatu dute–, eta elkarren artean koordinatu gara egutegian ekitaldiak ez zapaltzeko. Bortziritarrentzat luxu bat, horrelako talde aktiboa edukitzea».
Martxoaren 4an, ortziralarekin, Pintxo-pote morea eginen dute. Martxoaren 5ean, larunbat arratsaldeko 5etan, zoru pelbikoari buruzko tailerra eginen dute Beralandetan. Martxoaren 8an, 20:00etan kontzentrazio zaratatsua Mukixu zubian. Martxoaren 11an, Susanaren iraultza antzezlana ikusgai izanen da 20:30ean Kataku ostatuan. Martxoaren 12an, larunbatean 14:00etan bertso bazkaria izanen da Zalain jatetxean Onintza Enbeita eta Nerea Elustondorekin. Ondotik, triki-poteoa herriko karriketan. Gauerditik aitzinera, DJ Rakaraka eta DJ Maikarmens Kataku ostatuan.