Berdintasun handiko apustua izan zen. Larretxeak enbor beratsagoak plazaratu zituen eta horiek mozten hasi zen. Arria V.ak, aldiz, gogorragoak eraman zituen eta honek ere horiei ekin zien. Honela, lehen bortz enborretan aldea lortu zuen Donatok (2 minutu eta 5 segundokoa bosgarrenean). Lehen erdiko bigarren zatian, ordea, Arria V. alde hori murrizten joan zen eta lan erdiak Donatok baino 11 segundo lehenago bukatu zituen gipuzkoarrak. Lehia estu-estua beraz.
Bigarren erdiaren hasiera enborrik beratsenekin segitu zuen Arriak eta aldea handitzen joan zen (bi minutu inguru aitzinetik zen 15. eta 16. Enborrean). Bazirudien Arriak lortuko zuela apustua irabaztea, baina lanean segitu zuen Larretxeak. 17. enborrean minutu eta 19 segundora murriztu zuen aldea, 18.ean 18 segundo bertzerik ez ziren eta azken aurreko enborra kasik minutu erdi aurretik moztu zuen Donatok, zaleen txalo eta animoen artean. Azkenean, 47 minutu eta 18 segundo behar izan zituen lanak bukatzeko Larretxeak eta 48 minutu eta 14 segundo Arriak.
