Legasako Arcelor Mittaleko langileek greba eginen dute bihar

Ttipi-Ttapa 2025ko mai. 7a, 13:00

ELA sindikatuak ohar bidez jakinarazi du Legasako eta Aguraingo (Araba) Arcelor Mittaleko langileek greba eginen dutela bihar. Horrez gain, gaur eta etzi bi orduko lanuzteak eginen dituzte.

Sindikatuaren arabera, «ELAk eta UGTk osatutako batzordeak» egin dute grebarako deia. Enpresak aurkeztu duen enplegua erregulatzeko espedienteari erantzuteko eginen dituzte mobilizazioak. Erran bezala, bihar, maiatzaren 8a, greba eguna izanen dute eta bertzetik, gaur, maiatzak 7, eta etzi, maiatzak 9, bi orduko lanuzteak eginen dituzte. 14:30etik 16:00etara Berriobeitiko Arcelor Mittal lantegiaren parean kontzentrazioak eginen dituzte. Toki berean, biharko greba egunean, 14:30ean, adierazpenak eginen dituzte.

Legasako Arcelor lantegiko zuzendaritzak apirilaren 10ean eman zien lantegia ixteko asmoaren berri langileei. Arcelor Mittalek Legasan duen lantegiko produkzio guzia Agurainera eraman nahi dute. Bi lantegietan, Legasakoan eta Aguraingoan, 40 laguneko kaleratze kolektiboa iragarri dute, eta tartean, Legasako lantegiko 33 langile izanen lirateke.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun