Jesus Mari Etxart izanen da Legasako alkatea

Maiatzeko hauteskundeetan zerrendarik aurkeztu ez zen herrietan ez ezik, kontzejuetan ere hauteskunde eguna izan zuten igandea. Oieregin maiatzean aukeratu zuten alkatea, eta bigarren deialdi honetan, Legasan egin dute. Narbarten, ordea, ez denez inor aurkeztu, Nafarroako Gobernuak gestora bat izendatu beharko du.

Botoa ematera deituak zeuden 183 legasarretatik 79k parte hartu zuten igandean Legasako kontzejua aukeratzeko hauteskundeetan. Horien artean, Jesus Mari Etxart Ansalas izan zen boto gehien bildu zituena (72) eta, horrenbertzez, bera izanen da alkate. Baina talde-lanean ariko dira; Etxart alkatea eta hauteskunde egunean 25 boto bildu zituen Aintzane Martirena Hernandorena eta 24na boto hartu zituzten Koro Ibarra Santxotena eta Asier Hernandoren Lizaso. Gainerakoan, boto horiez gain, batek zuri bozkatu zuen.

TTIPI-TTAPA da Nafarroa Garaiko mendialdean dagoen euskarazko hamaboskari bakarra, eta zu bezalako irakurleen babesa behar du aitzinera egiteko.


Izan zaitez harpidedun