Egutegian ongi markatua zuten baztandarrek atzoko eguna, eta zenbat aste, egun eta hilabete ere igaro dituzten dena prestatzen, urteroko bilkura noiz ailegatuko zain. Eta ailegatu zen bada eguna, eguraldia lagun gainera, eta ez zuten hutsik egin; 15 herriek atera zuten orga bana eta ondotik ia 1600 lagun bildu ziren Merkatuko Plazan bazkaltzera. Halere, bertze hainbertze izan ziren hor bazkaldu ez eta ondotik ere dantzaldira hurbildu zirenak. Boneta, zapi eta koloretako jauntziz bete zituzten Merkatuko Plaza eta inguruak. Plaza giroan aniztasunean edertasuna.
Urteroko moduz, 11:00etan abiatu zen orga apainduen desfilea Santiago karrikatik eta ohitura zaharren oroigarri bihurtu zen Elizondo. Aurten Bertan, Baztango merkatari ttikien elkartea, izan zen banderaduna eta beraiek ireki zuten desfilea. Bidea ireki eta beraien gibeletik igaro ziren hamabortz orgak, dantza taldeak, fanfarreak, gaiteroak, txistulariak, trikitilariak... Antzerkien artean egiatik gehiago zuten batzuk eta akaso irudimenetik gehiago bertze batzuk, alta, txalotzeko modukoak denak. Iratze arrastoz gelditu zen ibilbidea, hortik pasatu zirenaren seinale eta bazkaltzeko Merkatuko Plazan egin zuten topo ia 1600 lagunek.
Bazkaria, solasaldia, sari banaketa, gaitak, mutxikoak, larrain dantzak eta ondotik erromeriak eta elektrotxaranga izan ziren entzungai. Ederki borobildu zuten eguna, baina auzolanak segida izanen du oraino dena bildu eta txukuntzeko. Bide batez, aurtengoak akitu eta heldu den urtekoaren zain geldituko dira baztandarrak.
