Atzo, gobernu bileraren ondotik egindako prentsaurrekoan Txibite kontseilariak azaldutakoaren arabera, Belateko tunelen bikoizketa «Nafarroako Foru Erkidegoan egiten ari den obrarik konplexuena da, eta ustekabekoek behartzen gaituzte erabakiak hartzera, obra egiten ari den bitartean segurtasun handiagoa bermatzeko, Bidasoko eta Ultzamako arroetan ingurumen kalteak saihesteko eta obraren egitura bera berme handiagoarekin egiteko».
Aurrekontua igotzearen arrazoi nagusienen artean, kontseilariak funtsezko hiru faktore aipatu zituen
Batetik, lurraren morfologia, proiektua egin aitzinetik egindako zundaketek adierazten zutena baino okerragoa; bigarrenik, menditik ateratzen den ur kopurua uste baino handiagoa dela; eta, azkenik, kanpoko erakundeek ezarritako eskakizun teknikoak, hala nola Nafarroako Gobernuko Industria Departamentuak eta Ebroko eta Kantauriko Konfederazio Hidrografikoek.
Aurrekontuak dituen kapitulu garrantzitsuenen artean, tunelaren indusketaren kostua 25 milioi eurotik 26ra igaro da, % 1,54ko igoera (1.042.000 euro). Leherketak eta bitarteko mekanikoak erabiltzen segituko bada ere, horretarako erabiltzen duten teknika egokitu eginen dute Nafarroako Gobernuaren Industria Departamentuak horrela eskatuta. Izan ere, aurkitu dituzten harri moten ondorioz, segurtasun neurri zorrotzagoak erabiltzea aholkatzen dute.
Tunelaren sostenguak % 5,7ko igoera izanen du, aurreikusitakoa baino 4 milioi euro gehiago. Barneko egiturak eta zertxak indartu eginen dituzte, metro linealeko 14 kilotik 43 kiloko jasangarritasunera handituz, gobernuaren Energiaren Zuzendaritza Nagusiak proposatuta.
Araztegietan, berriz, aurrekontuaren hazkundea % 2,4koa izanen da, aurreikusitakoa baino 1,6 milioi euro gehiago. Segundoko 8 litroko edukiera duten araztegiak proiektatzetik segundoko 40 litroko edukiera duten araztegietara igaroko da orain, lurzorutik datorren ur bolumenera egokitzeko eta konfederazio hidrografikoek eskatutako ingurumen baldintzak betetzeko.
Araztegietan, berriz, aurrekontuaren hazkundea % 2,4koa izanen da, aurreikusitakoa baino 1,6 milioi euro gehiago. Segundoko 8 litroko edukiera duten araztegiak proiektatzetik segundoko 40 litroko edukiera duten araztegietara igaroko da orain, lurzorutik datorren ur bolumenera egokitzeko eta konfederazio hidrografikoek eskatutako ingurumen baldintzak betetzeko.
«Obraren % 20 egina»
Obrek momentu honetan duten egoerari dagokionez, Oscar Txibite kontseilariak adierazi zuen dagoeneko 830 metro baino gehiago induskatu direla tunelaren iparraldeko ahoan, eta hegoaldeko ahotik ere indusketa hasi dutela. Denera, «egin beharrekoaren % 20 inguru burutu dute».