Duela hilabete pasa Foro SER Navarra topaketan parte hartu zuen Fernando Grande-Marlaska Espainiako Barne ministroak. Segurtasun publikoa eta polizia izan zituen solasgai, eta jakinarazi zuenez, «estatuko aurrekontuak onartzen direnean, azpiegitura plan berri bat eramanen dugu Ministroen Kontseilura». Bertan sartuko dute, bertzeen artean, «Guardia Zibilaren kuartel berri baten eraikuntza Elizondon, 8 milioi euro baino gehiagoko inbertsioa izanen duena».
Proiektua arbuiatu du Ernaik
Baztango Ernai taldeak adierazi duenez, «Baztanen dagoeneko hiru kuartel ditugu, eta proiektu honekin laugarren bat sortuko litzateke. Marlaska ministroak adierazi du inoiz baino beharrezkoagoa dela Nafarroan Guardia Zibilaren presentzia indartzea. Egun, Nafarroak estatuko polizia ratiorik altuena du; 1.000 biztanleko zazpi polizia, Europako batez bertzekoaren bikoitza. Zer itzulpen du honek? Gure herrian espainolismoaren gotorleku berri bat izateaz gain, gure egunerokoan kontrol polizialaren haunditzea izanen dela».
Honen kontra agertzeko, elkarretaratzea eginen dute Erratzun larunbat honetan, apirilaren 5ean. Herriko plazan bilduko dira 18:30ean, Aire hemendik! Guardia Zibilaren kuartelik ez lelopean. Asteburuan antolatutako Baztandik Independentziara! eguneko egitarauaren parte izanen da.