Elizondoko Herriak inauteetako egitaraua aldatu zuen iaz, eta danborradaren partez txarangapoteoa egitea erabaki zuen. Jendetza bildu zuen ekimenak, eta aurten ere berdin eginen dute; otsailaren 28an, ortziralea, 20:00etatik 22:00etara izanen da txarangapoteoa. Txokototik abiatuko da eta Txokoto, Hiru, Saioa eta Mendi ostatuetan aterako dituzte pintxoak. Casino, Txokoto eta Mendi ostatuetan eman daiteke izena sei euro ordainduta, eta txapa bereizgarria hartuko da ordaintzean.
Biharamunean, martxoaren 1ean, urteroko mozorroen desfilea izanen da goizean, eta aurten ere mozorro lehiaketa eginen dute. Bi kategoria izanen dira: desfilekoa (taldeka zein bakarka) eta ostatuena. 637 046 893 telefonoan eman beharko da izena, kategoria zehaztuz, eta otsailaren 26a izanen da horretarako azken eguna. Desfileko kategorian 200 euroko bonua izanen da saria, Bertaneko komertzioetan gastatzeko. Ostatuen kategorian, berriz, Baztango Zaporeak elkarteko produktuen sorta eta oroigarria.