Herriko Etxeko plazan hasita, bederatzi geldialditan Berako edo Berarekin harremana izan zuten emakumeen istorioak ezagutu zituzten bisitan parte hartu zuten 18 lagunek. Jon Abril aritu zen gidari lanetan, bera ibili baita azken aldian herritar aunitzentzat ezezagunak ziren emakumeen istorioak biltzen.
Helburua, orain arte gordetako eta ezagutarazi gabeko andreen istorioak ezagutaraztea izan zen, eta parte hartzaileak «hagitz gustura» ibili ziren ibilbide guztian.
Landa Eremuko Emakumeen Nazioarteko Eguna dela eta bertze bi ekintza izanen dira heldu den egunetan Bortzirietan. Alde batetik urriaren 20an, heldu den ortziralean Isildutako eskuak liburuaren aurkezpena izanen da Jon Abril idazlearen eskutik 19:00etan Arantzako Liburutegian. Liburuan, 1936ko gerra ondoko hamalau emakumeren istorioak, bizipenak eta oroitzapenak bilduak ditu Abrilek.
Azken ekintza urriaren 26an, ortzeguna izanen da Igantzin. Ekofeminismoak eta landa eremuko emakumea solasaldia izanen da udaleko goiko solairuan 18:00etan. Solasaldi horretarako ere izena eman beharko da berdintasuna@bortziriakberd.eus helbidean edo 722 69 30 78 zenbakira idatzita.