Fernando Anbustegi jarraituaren aldekoa da, «azken bi urteotan, jardunaldi jarraituarekin, hobeki ikusi baititut haurrak, gehienbat eskola 14:00etan akitu eta arratsaldetan denetarako denbora izaten zutelako: eskolaz kanpoko jardueretarako, etxeko lanak egiteko, lagunekin egoteko... Arratsaldea luzea zen eta haurrendako aise eredu hobea iruditzen zait». Dioenez, «talde kohesiorako edo lagunak egiteko egokiagoa izaten ahal da zatitua, zatituarekin ikastolatik ateratzean parkean gelditzen baitira jostatzen. Jarraituarekin, aldiz, denak etxera joaten dira eta gero ez dira elkartzen. Gehienbat ttikien artean gertatzen da hori, koxkorragoak beraien artean gelditzen dira». Gisa berean, onartu du «jarraituarekin neke gehiago sumatzen ahal dela ttikien artean». Dena den, «gurasoen gehiengoa jarraituaren alde izanda» ikastolan berriz ordutegia aldatzeko bozkatuko dutelakoan dago, eta bere ustez, «haurrek ere nahiago dute jarraitua». Hortik aparte, eredu aldaketak bertzelako eragozpenak ere sortu ditu: «Elizondoko eskolan jardunaldi jarraitua dute, eta gurean zatitua. Ikastolako ikasle batzuek beraien autobusa erabiltzen zuten, eta orain, ordutegi desberdina izateak buruhauste batzuk eragin ditu».