Belateko tunelaren barnean auto batek su hartu zuen atzo, baina ez zen inor zauritu. Suaren ondorioz, errepidea itxi zuten bi noranzkoetan eta trafikoa Belateko gainetik bideratu zuten. SOS Nafarroa zerbitzuari arratsaldeko bortzak aldera eman zioten abisua, Renault Megane bat erretzen ari zela Almandoz aldeko ahotik 1,3 kilometrora, ia tunelaren erdian (2.900 metro ditu).
Autoan zihoazenak arazorik gabe atera ziren tuneletik. Cordovillako eta Oronozko parkeetako suhiltzaileak bertaratu ziren sua itzaltzera, eta Nafarroako Gobernuko Herri Lanetako langileak arduratzen ziren garbiketa-lanez. Bi ordu eta erdi geroago, zirkulazioa berrezarri zuten.