Iñarrosi emakume* gazte taldeak egindako deialdiarekin bat eginez hainbat eta hainbat baztandar elkartu ziren ortzegun arratsaldean Elizondoko Foruen Plazan, Elizondoko Santiago bestetan gertatutako bortz eraso sexisten kontra egiteko. Etengabe erasotzen gaituzue zioen pankartaren gibelean elkartu ziren baztandarrak, gehien gehienak beltzez jantziak.
Elkarretaratzeaz gain, Baztango Balleko Etzeko udal ordezkari guztiek, Elizondoko Herriak eta Elizondoko Besta Batzordeak eraso hauek salatzen dituen adierazpen instituzionala ere onartu dute ahobatez.
