N-121-A

Alkoholemia-tasa seikoiztua zuen kamioilaria gelditu dute foruzainek Belaten

Ttipi-Ttapa 2021ko aza. 16a, 12:30

Foruzaingoak jakitera eman duenez, «kamioiaren gurpil bat lehertuta eta errepidean alde batetik bertzera zebilela» gelditu dute, «bide-segurtasuna arriskuan jarriz eta gomarik gabeko gurpilarekin errepidea kaltetzen ari zela».

Foruzainek egin dioten alkoholemia proban kamioilariak 0,91 mgr/l alkohol tasa eman du.

Ageri denez, Belaten aurretik zebilen kamioi batekin egin zuten topo foruzainek. Larrialdi kasuetarako argiak piztuta zebilen kamioia, 90 km/h-ko abiaduran, eta erremolkea ezker aldera okertuta. Hori ikusita, karga gaizki zuela susmatu zuten. Baina berehala konturatu ziren sigi-saga gidatzen zuela eta kamioiaren azpitik txinpartak ateratzen zirela. Zozaiaren parean gelditu eta ikusi zuten gurpil bat lehertuta zuela eta hagunarekin asfaltoa marruskatzen ari zela bide osoan.

Gidaria identifikatu eta alkoholemia proba egin ziotenean, 0,91 mgr/l alkohol tasa eman zuen. Horrek erran nahi du kamioia gidatzeko baimendutako tasa (0,15) sei aldiz gainditzen zuela. Delituarengatik prozedura penala abiatu dute gidariaren kontra eta, ortziralean, Iruñeko instrukzioko epaitegi batera joan beharko du. Bitartean, kamioia ibilgetua gelditu da errepide bazterrean.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun