Arraoizen etxean jokatu arren iruritarrak ez ziren kikildu eta azken partidak irabazteak emandako konfiantzarekin atera ziren finala jokatzera. Final orekatua izan zen eta azkenean 9 jokoetara iritsita Xabi Barberena, Gorka Urtasun, Jagoba Ramos eta Egoitz Primek jantzi zuten txapel preziatua. Arraioztarrak, Mindegia, Xabier Mihura, Miguel Maritorena eta Jon Gamiok bigarren postuko garaikurra jaso zuten.
Goizean hirugarren posturako partida jokatu zen. Aurrez aurre izan ziren Doneztebe Apeztegia eta Oiz. Doneztebeko laukoak, Jon Apeztegia, Ramontxo Etxebeste, Joseba Juanena eta Ibai Santestebanek, lortu zuen hirugarren postua. 9-7 irabazi zion Oizko taldeari, Aimar Saldias, Ioritz Zelaieta, Laurendi Zelaieta eta Iker Bereauri.
