Atzo arratsaldean Lekarozko plazan emandako prentsaurrekoan, 'Aroztegia geldituko dugu' ekimenaren parte-hartzaileek hurrengo egunetarako mobilizazioak azaldu zituzten. Gainera, Nafarroako Gobernuak Aroztegiko proiekturen inguruan Baztango Udalari «erabakitzeko eskumena ebatsi izana» salatu zuten, eta bizi dugun krisi sozio-ekonomikoa gelditu beharrean, areagotzea leporatu zioten.
EHNE-Nafarroak ekimenarekin bat egin du
EHNE-Nafarroa (Euskal Herriko Nekazarien Elkartasuna) sindikatua ere «Baztango Lekaroz herriko lurretan egin nahi den hirigintza-proiektu espekulatzailearen aurka» agertu da. Era berean, epaitegiak duela gutxi hartutako erabakiaren ondorioz, «legez kanpokoak diren obrak hastea eragozteko Baztango herritarrak egiten ari diren borrokarekin bat egiten dugu». Foru Gobernuari lan hauek berehala gelditzea eskatu diote, eta «Nafarroako Kontratu Publikoen Administrazio Auzitegiak 2019ko uztailaren 23an esleipen prozedurarekin jarraitzea ezinezkotzat jo zuela» gogorarazi dute.
Proiektua aitzinera eramateak «eskualdeko sektore garrantzitsuenetako bat den nekazaritzarako lursailen galera handia» dakarrela gehitu dute, Baztan «hirigintza espekulaziorako eremu» bihurtuz. Landa-garapen orekatuaren, ingurumenaren, kulturaren zein hizkuntzaren errespetuaren kontrakotzat jotzen duten «esku-hartzea» salatu dute. Herritarren borondatea kontuan hartu ez dela azpimarratu dute eta argi utzi nahi izan dute: «bistakoa da hau ez dela eskualdearen eta Nafarroaren onura kolektiborako bultzaturiko ekimen bat, baizik eta azkar aberastu nahi duten pertsona gutxi batzuen interes espekulatiboei soilik erantzuten duen ekimena».
