Argi utzi nahi izan zuten «euskal eskola herritar eta burujabea» dela euren helburua, «ikasleak erdigunean izanen dituen eta herritik eta herriarentzat kudeatua izanen den egitasmo burujabe, nazional, publiko eta askatzailea». Horrekin batera, «borrokarako irrikitan» daudela nabarmendu zuten, «gure neurrira eraikitako heziketa prozesua irabazteko borroka egiteko irrikitan. Beraz, sinetsi dezagun. Badaukagu gogoa, gaitasuna, indarra eta potentziala».
Alde batetik, «ikasleria subjektu politiko den heinean hitza eta erabakia gureak direla» aldarrikatu zuten. Horrekin batera, «herritik eta herriarentza» lan eginen dutela adierazi zuten,«hezkuntza komunitateko kideekin elkarlanean, gurea ez baita subjektu isolatu bat».
Ikasturte hasieraren harira, «agintarien utzikeria eta inprobisazioa ikaragarria» dela azpimarratu zuten. «Ikastetxeetan biltzen garenon osasuna bermatzeko baliabide nahikorik ez dute ahalbidetu, eta okerrena dena, gure osasun segurtasuna aitzakiatzat hartuta aurrerakuntza pedagogiko orori ateak ixteko aprobetxatu nahi dute krisi hau». Hala, egoera onartu ezin dutela iritzita, irailaren 15erako egina den greba deialdiarekin bat eginen dutela azaldu zuten Elizondon egindako agerraldian.