Orai bai, orai ez. Orai norbere herrian, orai udalerri osoan. Orai ordutegi zehatzen menpe, orai edozein ordutan. Horrela dabiltza Baztanen azken egunetan, kirola kanpoan egiteko aukerari buruz. Atzo bertzelako aginduak jaso bazituzten ere, badirudi oraingoan, norberaren herrian ordutegirik gabe ibiltzen ahalko direla baztandarrak, adin tartea edozein dela ere, baina norberaren herritik kanpo ez da kirola egiteko mugitzen ahalko. Halaxe jakinarazi dute Gobernuko ordezkaritzatik, Baztango udal ordezkariekin mintzatu ondotik.
Adibidez, zigatarrak, arraioztarrak… herriko mugetatik atera gabe egun osoan ibiltzen ahalko dira, baina gartzaindarrak ez dira Otsondorat joaten ahalko. Irizpide berriak berme osoarekin eguerditik hartuko du indarra.
Irizpideak Gobernuko ordezkaritzak ematen ditu, eta Baztango Udalak ohar bidez adierazi duenez, «aldaketa hauek herritarren artean sortu duten nahasmenduaz jakitun gara, horregatik, sortutako eragozpenengatik eta ulerkortasuna eskatzen dugu».
