Larunbat honetatik aitzinera, Baztan-Bidasoko ekoizle eta saltzaileak beraien postuekin berriz ere Elizondoko plazara aterako dira. Iaz hasi zuten bide beretik, hilabete bakoitzeko lehenbiziko eta hirugarren larunbatetan, bertako ekoizle eta saltzaileek beren produktuak plazara ateratzeko parada adostu dute Baztango Udalarekin.
Koronabirusak eraginda, jarduera eten ondotik, hurrengo larunbatetik, maiatzaren 2tik, berriz ere Elizondoko plazan 09:30etik 14.00etara. Betiere garbi edukita, salgaiak elikagaiak izan beharko direla, jateko eta edatekoak dute momentuz tokia eta baimena.
Irular mermelada, Etxalarko Okindegiak, Etxetxipia Gasnategiak, Ernaut 'Euskal Txerri' produktuak eta Pittika gasnategiak konfirmatu dute larunbat honetan berriz ere plazan izanen direla, ekoizle ttikiak ere lanean segitzeko gogotsu daudela erakusten, eta bertako biztanleei hurbiltasuna eskainiz momentu zail hauetan
Dena ongi joan dadin, Nafarroako Gobernuak merkatuen inguruan bete beharreko segurtasun neurriak kontutan hartzea eskatu zaie hurbilduko diren herritarrei, egoera berezi honetan ahalik eta jarduera zuzenena izan dadin.