Blanca de Navarra Emakumeen Elkarteak Ana Mari Marin baztandarra omendu du

Marinek margolari bezala ez ezik, bertze alorretan  egindako lana aitortu dio elkarteak Elizondoko Kasinoan

Margolari izateaz gain, hainbat alorretan aritua da Ana Mari Marin eta horiek goraipatu nahi  izan ditu Blanca de Navarra Emakumeen Elkarteak: «Elizondoko abesbatzako kide izan zen, Baztandarren Biltzarra elkartearen sorreran parte hartu zuen, emakumeek politikan toki handirik ez zuten garaian zinegotzi izan zen, Elizondoko alkate ere izan zen, Munduko Medikuak elkartearekin eta UNICEFekin laguntzen ibili zen eta gazteen alkoholemiaren aurkako kanpainetan ere parte hartu izan du, bertze hainbertze ekintzetan bezala», adierazi du emakumeen elkarteak. Hori gogoan omendu dute larunbatean Elizondoko Kasinon. Argazkiak: Fernando Anbustegi

Ana Mari Marinekin batera, hainbat lagunek parte hartu dute ekitaldian. Hala nola, hor izan dira Begoña Lopez elkarteko idazkari nagusia, Eduardo Zubikoa Elizondoko Kasinoko lehendakaria eta Baztan Museoko lehendakariordea eta Agustin Olabe Baztan Museoko lagunen elkarteko idazkaria. Juan Ramon Corpas Rio Arga poesia aldizkariko zuzendariak eta Iratxeko Lagunen Elkarteko presidenteak ez zuen Elizondora hurbiltzerik izan, baina idatzi bat igorri zion Marini. Elizondoko margolariak lore-sorta, elkartearen oparia eta bere marrazkiak ageri dituen poesia-aldizkariko 144. zenbakiaren ale bat jaso zuen.

Erlazionatuak

TTIPI-TTAPA da Nafarroa Garaiko mendialdean dagoen euskarazko hamaboskari bakarra, eta zu bezalako irakurleen babesa behar du aitzinera egiteko.


Izan zaitez harpidedun