«Mendira joatea, musika entzutea, lagunekin egotea, baratzea lantzea, eta orain, udan, hondartzara joatea». Zaletasun horietxek dituela kontatu digu Loinaz Azurmendi Gaztelumendi elizondarrak. Afizioz horiek, eta ofizioz, berriz, erizaina da. Bere hitzetan, «beti ikasten aritzea eskatzen duen lanbidea da. Oposaketak, ikastaroak...».
Egunerokoa alde batera utzita, aurten estreinakoz, Elizondoko bestak antolatzeko Besta Komisioan ere sartu da. Aitortu digunez, «aspaldi nintzen komisioan sartzeko gogoarekin», bere irudiko «herriko bestak herritarren artean antolatzea arras positiboa» delako. Hamabortz lagun biltzen dira Besta Komisioan, eta Loinazen arabera, «talde polita osatzen dugu». Martxo aldera egin omen zuten lehenbiziko bilera: «lehenbiziko, plangintza orokor bat egin genuen, egin beharreko lanak mahai gainera ateratzen hasi ginen». Eta horretarako «bertze urteetan batzordean ibili den jendearen esperientziak garrantzi haundia duela» dio. «Hortik hasita, lanak denen artean banatu ditugu. Hala ere, denak bat bertzeari esku bat botatzeko prest gaude».
Aurten sokadantza
Aurtengo egitarauak berrikuntza bat behintzat baduela aipatu digu Elizondoko gazteak: «soka-dantza prestatzen ari gara herritar batzuen artean, Santio egunean plazan dantzatzeko».
Aurrekontuari dagokionez, berriz, ez dela haundia adierazi digu, eta gaineratu digunez, «urtetik urtera gutiagora doa». Gastuak finantzatzeko «komertzio eta enpresen iragarkien bidez, kaleko saltzaileei postua jartzeagatik eskatzen zaienarekin, etxesariarekin eta zikiro-jateko txartelekin» biltzen dutenarekin egiten omen dute.
‘Eguneko besta, dudarik gabe’
Eguneko ala gaueko giroaren artean aukeratu beharko balu «dudarik gabe, egunekoa» nahiago duela azaldu digu. Bortz egunez ekitaldi saila izaten dituzte Elizondon, eta horien artean aukeratzeko eskatuta, honela erantzun digu: «txupinazoko momentua gustuko dut, eta Fanfarreak Ziga plazan dantza herrikoian jotzen dituen momentua ere bai». Egunen artean, aldiz, Zikiro Eguna omen du gustukoena. Urrutira joan gabe, badakigu non barna aurkituko dugun Loinaz uztailaren 24tik 28ra, herriko bestetan, «ilusioarekin» bizi dituelako eta «herrian sortzen den giroa gustatzen» zaiolako.