ELAk helarazitako oharrak dioenez, 2015eko abenduaren 14an izan zuten hitzarmena berritzeko lehen negoziaketa bilera. Langileen Batzordeak hitzarmen berrirako proposamena aurkeztu zuen, eta momentuko egoera ez zela ona argudiatuz, ezin zutela erantzunik eman adierazi zuen zuzendaritzak.
Abenduaren 23an egindako bigarren bilera batean hasi omen ziren langileak zuzendaritzaren egiazko borondatea ikusten. «Lan erreformak enpresei ematen dizkieten eskumen guztiak erabiltzeko aukera nahi dute, lan baldintzak deuseztea, kaleratze merkeak, sinatzen dutena ez aplikatzea… azken finean, lan prekario bat bultzatzea Benito Mennin», dio ELAren idatziak.
Aurrerapauso nabarmenin ekarri ez zuten bi bileren ondotik, Langile Batzordearen eskaerari erantzunez, proposamen berri bat ekarri zuen zuzendaritzak orain arte egin den azken bilerara, otsailaren 18an. 2016ko aurrekontuak eginak dituztela argudiatuz, langileen kostua handitzen den edozer gauzari ezezko borobila emateaz gain, orain arteko urteko lanaldia handitzea 2012-2013kora itzuliz, antzinatasuna ezabatzea… proposatzen du zuzendaritzak.
Langileen Batzordea osatzen duen ELA sindikatuaren erranetan, «langileok urte asko daramagu soldata igoerarik gabe eta azken urte hauetan, enpresako datu ekonomikoei begiratuz, irabaziak izan dituen arren, ez dute ikusi eta entzun ere egin nahi langileen kostua handiagotuko duen ezer».