Julio Sotok irabazi du Elizondoko Baztan pilotalekuan jokatu berri den 2015eko Nafarroako Bertsolari Txapelketako finala. 1.250 bertsozalek jarraitu dute finala bertatik bertara. Bigarren postua Xabier Terrerosentzat izan da eta, haren ondotik, Eneko Lazkoz, Oskar Estanga, Eneko Fernandez, Ander Fuentes, Julen Zelaieta eta Aimar Karrika sailkatu dira. Ikusi argazkiak https://www.facebook.com/ttipi.eus/media_set?set=a.10205144923877357.1073742148.1072491276&type=1&pnref=story
Zortzikoteak bere lan puntuagarria bukatu ondotik Julio Soto eta Xabier Terreros izan dira buruz-burukoa jokatu dutenak.
Honela gelditu da finaleko puntuazioa:
Julio Soto: 797,5 puntu
Xabier Terreros: 759
Eneko Lazkoz: 446,5
Oskar Estanga: 430,5
Eneko Fernandez: 420,5
Ander Fuentes “Itturri”: 412,5
Julen Zelaieta: 411
Aimar Karrika: 405,5
Fernando Anbustegi eta Alaitz Rekondok gidatu dute finala. Epaile lanetan Nerea Bruño, Mikel Beaumont, Jon Abril, Arkaitz Goikoetxea eta Saioa Mitxelena aritu dira eta Nerea Goñi idazkari lanetan.
Momentu ederrak izan ditu saioak: Baztango Ikastolako seigarren mailako haurrek bertsotan aurkeztu dituzte finalistak saioari hasiera emanez eta Juanjo Atxa almandoztarra izan da Julio Sotori txapela jantzi dioena. Baztan ikastolako irakasle izanik, urte luzeetan zehar eskola orduetan bertsolaritzaren transmisioan eta zabalkundean eginiko lan isil eta etengabea eskertu nahi izan diote Nafarroako Bertsozale Elkartetik.
Zortzikoteak saio ederra egin zuen. Denen buru Julio Soto. Saio bikaina azken agur hunkigarriarekin borobildu zuen, begiak malkotan zituela.
Txapeldunaren agurra:
Julio Soto / Elizondo, 2015-03-28
Aitak zuri hitz egiten
pasatzen ditu egunak
egunero pizten dizu
kandela ama kuttunak.
Itsaso zurekin dago
dauden bezala lagunak
Idurre eta Gorriti
eta oilagorren lumak
guztiok elkartzen gaitu
zuganako maitasunak.
Alberto hartu itzazu
Besarkada bihotz dunak
Gutxi barru aurrez aurre
emango dizkizugunak.
