‘tXiotxioka’ dantza eta musika emanaldia izanen dute igande goizean Saran

Ttipi-Ttapa

Dantza eta musika uztartzen ditu Elirale-Pantxika Telleria konpainiaren 'tXiotxioka' ikuskizunak.

‘tXiotxioka’ dantza eta musika emanaldi berezia izanen dute azaroaren 22an, igandean 10:30etik 11:15era Sarako Lur Berri gelan. Elirale-Pantxika Telleria konpainiaren binakako lan koreografiko musikatua da ‘tXiotxioka’. Euskarazko ikuskizuna, ikusmen-urritasuna duten pertsonentzat ere irisgarria. Ikuskizunaren koregrafia japoniar haikuen hizkuntza poetikoan inspiratzen da. Taula gainean dagoen musikari baten laguntzarekin, dantzariek hitzek sortzen duten mugimendua beraiena egiten dute.

Pantxika Telleria da taula eramailea eta Maddi Zubeldia eta Jon Vernier edo Joana Puret (txandaka) interpreteak, Paxkal Irigoyenen musikarekin.

 

Sinopsia

tXiotxioka isiltasunean jartzeko eta kontenplazioa-egoera idekitzeko gonbidapena da. Gorputza habia bihurtzen da orduan, Haikuaren hizkuntza poetikoari bide emanez, eta horrek, aldi berean, mugimendua birbanatzen du. Euskarara itzulitako antzinako japoniar haiku herrikoiak, hitz-jokoak eta txioka lexikoak dira tXiotxioka ikuskizunaren ahozko literaturaren errepertorioa. Hitza mugimenduaren inspirazio iturria da, eta dantzariek hura aprobetxatzen dute, musikari laguntzailearen konplizitatearekin. Gorputzaren mugimenduak garatuz eta unibertso sonoro sotil bat proposatuz, obrak batez ere publikoa lasaitasunean, baretasunean, eta, zergatik ez, ongizatean murgiltzea nahi du.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun