Urtetan zikiroa erretzen aritu eta erretiratu diren hameka lagun omenduko dituzte igandean Zugarramurdin

Errefeta edo besta ttikietako “etxeko” zikiro jatean 250 bat lagun bilduko dira

Errefeta edo besta ttikietako eguna izanen dute igandean Zugarramurdiko lezean. Abuztuaren 18an, bestetako hondarreko egunean, 800 lagunendako zikiro jatea prestatu zuten zugarramurdiarrek eta orduan auzolanean aritu ziren herritarrak, laguntzaileak eta lagunak bilduko dira orain beraientzat prestatuko duten bazkarian. Halere, 250 bat lagun izanen dira “etxeko” zikiroan. Honen harira, egun horretan berean, eta 13:30ean, plazan, omenaldi bat eginen zaie zikiroan lan egindako eta ia erretiratuak dauden hameka lagunei. Bidenabar, auzolanaren garrantzia azpimarratzeko erabiliko da ekitaldi hau.