‘Hurrup eta xo!’ esperientzia berria abiatuko dute ekainaren 12an Sarako lezeetan

Ttipi-Ttapa 2026ko ekainaren 11

Ibilbideak ohiko bisitatik kanpoko eremuak zeharkatuko ditu eta bukatzean, lezearen atarian, Nafarroako jakiak eta ardoak dastatzeko aukera emanen du.

Sarako lezeek Hurrup eta xo! aurkeztu dute, zentzumenak eta gastronomia uztartzen dituen gaualdi berezien ziklo berria. Hitzordu berri horrek lezea bertze modu batean deskubritzera gomitatzen du, Euskal Herriko zenbait eskualde zaporeak eta jakitateak ezagutuz. Ekitaldiaren edizio bakoitzak Euskal Herriko eskualde bat izanen du ardatz, haren ekoizleak eta kultura gastronomikoa balioan emanez. Lehen hitzordu honetan Nafarroa izanen da protagonista. Ekainaren 12an, ortziralean, 19:00etan, parte hartzaileek lezea baldintza berezietan deskubrituko dute, behaketa, entzutea eta sentsazioak sustatzen dituen ibilbide baten bidez. Sarrera 20 euro ordaindu beharko da eta gehienez 20 lagunentzat tokia izanen da. Erreserba

Lurpeko ondarea eta Euskal Herriko lurraldeetako zaporeak uztartzen dituen esperientzia da eta Nafarroa izanen da protagonista ortzirale honetakoan

Ibilbideak ohiko bisitatik kanpoko eremuak zeharkatuko ditu, eta normalean publikoarentzat hetsia den gela batera ere eramanen ditu bisitariak. Bertan, dastaketa bat proposatuko da, lurpeko ingurunearen tenperatura eta hezetasun baldintza naturaletan.

Gaualdiak lezearen atarian segituko du, Reyna de Copas-ek (Erriberri) proposatutako Nafarroako jaki eta arno dastaketarekin. Parte-hartzaileek Nafarroako arno hautaketa bat deskubrituko dute, lurraldeko ekoizpenekin batera, hala nola Baztango arnoak nahiz Bardeetako gasna.

Gizartea Xareta Sara

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.

Egin TTIPI-TTAPAren lagun