Txirrindulariek Erratzun hasi zuten larunbateko lasterketa eta oso-osorik eskualdean egin zuten Nafarroako Itzuliko etapa nagusia. Elizondo, Irurita eta Arraiozen barna pasatu ondotik, Oronoz-Mugairin izan zuten lehen tarteko helmugan Eulen Amenabar taldeko Lohann Vulliez nagusitu zen. Doneztebe, Elgorriaga eta Iturenen sei txirrindulari ziren tropelaren aitzinetik, baina hamabi segundoko aldea baino gehiago ez zuten lortu. Saldiasko gainean Caja Rural-Aleako Adriá Regada izan zen lehenbizikoa, Cortizo taldeko Aimar Tadeo liderraren eta Finisher taldeko Emilio Garciaren aitzinetik.
Saldiastik Doneztebera jautsi eta berriz ere Baztan aldera jo zuten txirrindulariek, etapako lau kaxko nagusiak esperoan baitzituzten: Otsondo, Eskisaroi, Bagordi eta Orabidea. Hamasei lagunetatik seira murriztu zen ihesaldia Otsondoren ondotik eta Eskisaroi igan eta gero, helmugara ailegatzeko 32 kilometro falta zirela, Gomur Cantabria taldeko Sergio Gutierrez zen aitzinetik. Baina lehen mailako Bagordira igaten ari zirela, Gutierrez harrapatu eta gerora Urdazubira aitzinetik ailegatu zen hirukotea, Aimar Tadeo liderra, Adriá Regada eta Marco Martin Cuevas, jarri zen aitzinetik. Horien artean, BBK-Euskadi taldeko Martin Cuevas ibili zen bizien Urdazubin garaipena eskuratzeko.
