Irlandako Ye Vagabonds eta Olaia Inziarteren kontzertuak izanen dituzte apirilaren 18an Sarako Santa Katalinan

Ttipi-Ttapa 2026ko martxoaren 13a
Deskargatu Info Ahotsak :
Español English Français Català Galego

Irlandako Ye Vagabonds taldea Europan barrena biran da eta Sarako Santa Katalinan izanen du geldialdia apirilaren 18an.

Usopop elkartearen eskutik, Europan bira egiten ari den Irlandako Ye Vagabonds anaien folk doinuak aditzeko aukera izanen da apirilaren 18an Sarako Santa Katalina kaperan. Aitzinetik, Olaia Inziartek ere kontzertua emanen du, baina larunbat arratsalde osoan izanen dira musika doinuak, bai elizan, baita parkean ere. Sarrerak 12,99 eurotan salgai daude.

Egitaraua

17:00etan ate idekitzea. 17:30ean Gartxot (parkean urririk). 18:10ean Sorcha Richardson (parkean urririk). 19:00etan Olaia Inziarte (elizan). 20:00etan txaranga (parkean). 20:30ean Ye Vagabonds (elizan). 21:30ean txaranga (parkean).

Olaia Inziartek kantatuko du irlandarren aitzinetik.

Usopop elkarteak jaialdira joateko gonbidapena egin du: «Etor zaitezte Irlandako Ye Vagabonds anaia-bikotearen folk argitsua deskubritzera: folkaren berpizkunde berriaren aitzindari bihurtuak, gitarra uztartuekin, ahots-harmonia finenekin eta aberastasun instrumental handiarekin. Lehenik, Olaia Inziarte, egungo euskal eszenako ahots berezia, folkaren eta testura elektronikoen artean dabilena. Musika intimista eta sentikorra, ahots aldi berean leun eta bizi batek eramana».

Kultura Xareta Sara

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun