Gazteek auzoz auzo egindako eskean, gazteak animoak bidali zizkioten 45 urtez ihauteriak alaitu dituen Modesto Ordoki akordeoilariari
Denborak hasierako planak aldaraztea eragin zuen baina ez zen alaitasunik faltatu. Aurtengo gaia batukada izan zen eta ikasle guztiak bildurik, bi koreografia prestatu zituzten. Herriko frontoian bildu ziren ikasle eta irakasle guztiak eta lehenik herri kiroletan aritu ziren denak. Gero, guraso elkarteak eta udaletxeak antolatutako luntxa izan zen eta azkenik, gure herrietako artistek osatutako bi koreografien emanaldia izan zen.
Modesto Ordoki gogoan
Eskolako ihauterien ondotik herriko gazte eta haurrak indarrak hartzen egon ziren larunbatean eta igandean, denborari aurre egin eta etxez etxeko eskeari ekin zioten. Musikak alaitu zuen zeru grisa eta gazte eta haurren kantua entzun zen auzoetako etxeetan. Astelehenean, otsailaren 16an, berriro ere etxez etxeko eskean ibili ziren gazte eta haurrak, denbora txarrak Urdazubiko ihauteriak zapuztuko ez dituela argi utziz. Azkenik, asteartean haurrak herrian eta gaztean Dantxarinean ibili ondoren, elkarrekin, ihauteriei bukaera eman zien. Gazteek, 45 urtez Urdazubiko ihauteriak alaitu dituen Modesto Ordoki akordeoilariari animoak bidali zizkioten. Urtero bezala, mila esker etxeko ateak ireki dituzuen herritar guztiei bertze behin herri ihauteri hauei bizitza emateagatik!
