Otsaileko bigarren astean edekiko da seguruenik Zugarramurdiko frontoia

Ttipi-Ttapa 2026ko otsailaren 5a
Deskargatu Info Ahotsak :
Español English Français Català Galego

Itxura ederra hartu du Zugarramurdiko frontoiak eta seguruenik martxoan eginen dute inagurazioa.

Udazkenean hasita, 185.000 euroko kostua duten lanak egiten ari dira eta 70.000 euroko laguntza izanen du herriko etxeak

Udazkenetik hetsita egon ondotik, segur aski otsailaren bigarren astean edekiko dute Zugarramurdiko frontoia. Zola leuntzea izan da azkeneko lana, eta hori orain, urtarrileko azkeneko astean, egin dute. Teilatuari isolamendua eta inpermeabilizazioa eman diote, paretak eta harmailak pintatu dituzte, hautsita zeuden kristalak eta usteldutako zurak aldatu, markagailu eta sare berriak eman, frontisean lona berria paratu eta zola leundu.

Honek guziak 185.000 euroko kostua izan du, baina 70.000 euroko dirulaguntza ere izan du herriak. Ez da oraindik eguna erabaki, baina martxoan eginen da inaugurazioa.

 

Dirulaguntzak

Bertze aldetik, dirulaguntzak eskatzeko aukera edeki du udalak. Hiru motakoak dira: kultura, gizarte, eta kirola (bakoitzerako 5.000 euro bideratu dira). Bertzalde, joan den urtetik berdintasunerako 1.500 euro ere badaude, baino adi, hauek ekaina baino lehen gastatu behar dira. Eskaerak otsaila bukatu baino lehen aurkeztu behar dira herriko etxean.

Gizartea Xareta Zugarramurdi

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun