Eneko Pelletrat zena gogoan izan dute Iparraldeko Joko Garbi Txapelketako finaletan

Ttipi-Ttapa 2026ko otsailaren 4a

Zaharrer Segiko Teo eta Iban Riouspeyrous eta Haddoytarrak taldeko Bruno Driolet eta Eneko De Paredes final nagusian, Eneko Pelletrat zenaren argazkiarekin.

Endaiarrak eta Iparraldeko Pilota Batzordeko joko garbi batzordearen antolaketa biziki polita, publiko anitz, joko maila bikaina, omenaldi hunkigarria... Hendaiako Daniel Ugarte ezker paretean Iparraldeko joko garbi txapelketa finalen eguna ederra izan zen urtarrilaren 17an. Hendaiako final egun hau pilotarientzat eta joko garbiko munduarentzat ere aukera izan zen Kapito Harrin eta Iparraldeko Komitean joko garbi garapenaren funtsezko ardatza izan dena omentzeko: Zugarramurdin bizi zen Eneko Pelletrat.

Hendaiako jokatutako finaletan, SPUCeko Karrikaburu eta Jauregiberri txapeldun izan ziren bigarren mailan, Iziaga eta Larrevere-Bonnet txapeldun M14 mailan eta M16an txapeldunorde izan ziren Hacala eta Iziaga

Kirol arloan, eskualdeko pilotariak ere baziren finaletan, Senpereko SPUC taldekoak. Bigarren mailan eta M14 mailan txapeldun suertatu ziren gainera. Bigarren mailan, SPUCeko Karrikaburuk eta Jauregiberrik 40-33 irabazi zieten Hiriburuko Aiharako Bergereti eta Coyosi eta M14 mailan, SPUCeko Iziagak eta Larrevere-Bonnetek 40-39 irabazi zieten Kapito Harriko Faucheri eta Seialles-Mirabeli.
M16an, aldiz, Hardoytarrak taldeko Lascube-Drioletek eta Mundubeltzek 40-19 irabazi zieten SPUCeko Hacalari eta Iziagari.

USSP Amikuze (Mendribil – Bourde) txapelduna izan zen M19an, Aviron Bayonnais taldeari (Iturria – Irigoyen) 40-31 irabazita.

Azken final handian, Zaharrer Segiko Riouspeyrous (Teo eta Iban) anaiek 40-24 irabazi zieten Hardoytarrak taldeko (Drioleti eta De Paredesi.

Kirola Xareta Senpere Zugarramurdi

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.

Egin TTIPI-TTAPAren lagun