Ortziralean 19:00etan proiektatuko dute Fermin Muguruzak egin ikus-entzunekoa Lurberri gelan, Mugaz Gaindi zikloaren baitan
2018ko udan Frantziak ezarritako kontrolen eta Bidasoako pasabide batzuen itxieraren ondorioak azaltzen ditu filmak; neurri horiek hamarnaka pertsonaren heriotza eragin zuten urte bakar batean. Eztabaida izanen da proiekzioaren ondotik.
Abenduaren 28an Miñan antzezlana
Zikloa burutzeko, abenduaren 28an, larunbatean, 10:00etatik aurrera, mediatekako animatzaileek bereziki hautatutako liburuan irakurketa saioak eskainiko dituzte mediatekan eta kiroldegian. Arratsaldean, ekitaldi nagusia, 17:00etan, Miñan antzezlanaren azken emanaldia izanen dute herriko gelan. Sarrerak 13 eurotan salgai daude Interneten.
Amets Arzallusen liburuan oinarritutako antzezlanean, egileak Ibrahima Baldé gazte Ginearraren benetako istorioa kontatzen du; Irunen ezagutu zuen, eta bere anaia txikia aurkitzeko Afrikan barna egindako odisea kondatzen du. Antzezlana Euskal Herri osoan zehar ibilia da, baita hilabete batez Londresen ere. Ohore handia da bira Saran bukatzea, historian zehar Sara askotan harrera herria izan baita.
Ekitaldi hauek, herriko elkarteen lankidetzarekin eta Herriko etxearen laguntzarekin antolatuak, elkarrizketa, kultura eta elkartasuna sustatzeko gune bat irekitzea dute xede, «gure inguruko errealitateei buruzko gogoeta partekatzeko».