Denis Endara da Sarako Izarra pilota elkarteko lehendakari berria

Ttipi-Ttapa 2025eko azaroaren 18a

Aurten finalista izan diren Sarako Izarra elkarteko pilotariak.

Sarako Izarra pilota elkarteko biltzar nagusia hazilaren 14an iragan da lezeetako gelan. Denera 50 bat jende presente ziren. Guy Mounho lehendakariak denei ongi etorria egin eta urteko bilana eman du. 20 final jokatu dituzte eta 14 irabazi (5 Euskal Herriko batzordean, 4 Frantziako txapelketan, 4 Union Basquekoak eta Euskal selekzioarekin bat). Denera 90 pilotari badira. Partidak Sarako eta Amotzeko trinketean egiten dituzte, ezker paretean Azkainen eta errebotekoak plazan, Omordian eta kiroldegian. Partida ainitzetan Jakes Iriarte izaten dute juja. Edukatzaileak, berriz, esku huska Pantxoa Olzagazti, Daniel eta Mattin Mariluz eta xisteraka Guy Mounho.

90 pilotari ari dira Sarako elkartearen izenean, aurten 20 final jokatu dituzte eta horietatik 14 irabazi dituzte

Txapeldunei eman dizkiete txeke bana. Gero mintzatu ziren udako erakustaldiez, ongi aritu direla bertze elkarteekin. Bruno Martin diruzainak eman ditu kontuak, lana ainitz egin behar dela baina erakustaldi horiek diru laguntza handia ekartzen dutela, baita herriko etxeak, lantegiek eta borondate oneko ainitzek emanak. Horregatik, kontuak positiboan dituzte. Lehendakariak eskertu zituen pilotariak, bere bulegokoak, entrenatzaileak eta buraso guziak.

50 bat lagun izan ziren Sarako Izarra pilota elkartearen urteko biltzarrean, hazilaren 14an.

Denis Endara lehendakari berria

Guy Mounho lehendakariak jakinarazi zuen baduela 14 urte bulegoak hartu zuela pilotako elkartea eta orain aspertuak direla eta uzten dutela beraien kargua. Beraz, izan dira bozak bulego berriarentzat. Lehendakaria: Denis Endara. Idazkariak: Maite Goienetxe eta Aurelie Behotegi. Diruzaina: Fançois Chaulet. Kideak: Xabier Tapia, Eneko Arribillaga, Iñaki Jauregi, Aritz Lekuona, Guy Mounho, Unai Iribarren, Jakes Sanzinena, Gaelle Indaburu eta Edurne Urrutia Borda .

Ondotik izan zen pintxo eta edateko denentzat, haur eta heldu, dena umore onean.

Kirola Xareta Sara

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.

Egin TTIPI-TTAPAren lagun