Mariñel/arrantzaleak, Saratik Ternuarat sorkuntza berezia izanen dute irailaren 5ean, ortziralean 19:00etan hasita Sarako leizeetan, Xortaz xorta programaren baitan. Mintzaldi ilustratua izanen da, Jean Claude Ttikia Enriqueren eskutik, Patxi Amuleten kantuekin.
Sarako marinelen XVI. eta XVII. mendeetako Ternuarako bidaietan barna ibiltzeko eta beraien abenturak ezagutzeko aukera izanen da, kontakizunen, irudien eta kantuen bidez. Mintzaldia frantsesez izanen da eta kantuak euskaraz. Sartzea urririk izanen da, Sarako lezeetako webgunean aitzinetik izena emanez (leku mugatuak). Gaualdia hurrupaldi partekatu batekin bukatuko da.