Sarako Lezeek eta Usopopek elkarlanean Marrumaka «besta herrikoia» antolatu dutela aipatu du Patxi Dutournierek, Usopopeko kideak. «Urriaren 4an ea 5ean izanen da eta egunean zehar bazkariak, tailerrak, jardunaldiak eta bertzelakoak izanen dira. Gauean, aldiz, kontzertuak eta besta giroa nagusituko dira». Izenburu bitxia jarri diote asteburuari, lezeetako kondaira zahar bati erreferentzia eginez. «Lezeetan bizi zen behi gorriaren marrumei eta ondorioz jendeak herrian aditzen zuen zaratari erreferentzia egin diogu, nolabait lezeak eta bertan izanen zarata girotsua lotu nahian».
Ekitaldi berezia izanen dela ziurtatu du, «adin guztietako jendearendako» aproposa izanen delako eta gainera herriko lezeetan eginen delako, «leku zoragarrian». Bi motatako sarrerak daude salgai Sarako Lezeetako webgunean, asteburu osokoak edota egun bakoitzekoak. «Sarrerak lehenbailehen erostea gomendagarria da txartel mugatuak baitaude», gehitu du.