Zugarramurdiko eskolako Guraso elkarteak antolaturik, auzolana eginen dute eskolako patioan. Familiez gain, lan egiteko gonbidapena herritar guziei zuzendua dago. Ekainaren 7an izanen da, eta hitzordua larunbat goizeko hamarretan emana da.
Proiektuaren arabera, aldaketa polita izanen du patioak, hau eginen delako: pneumatikoekin egindako oreka bide bat eta loreontziak, kableen bobinekin egindako mahaiak, eta azkenik, pareta pintatu. Lan handia da, baina nahiko jende elkartuz, eta taldetxoetan antolatuz, den-dena egitea posible izanen dela espero du guraso elkarteak. Laguntzera etortzen direnei, palak, aitzurrak, brotxak eta arrabolak eramatea eskatu diete.
Burdinezko seinale berriak eman dituzte eskolan
Elizondo Lanbide Heziketa Eskolako ikasleek eginik, burdinezko seinaleak eman dituzte Zugarramurdi eta Urdazubiko eskoletan. Urdazubi-Zugarramurdiko eskola letretan eta pottoka bat emana da. Gure eskolak ez du izen berezirik, baina aipatzekoa da Ixtilartea izena zuen etxean egin zela. Garai batean bi eskola ziren herrian (1960ko hamarkada bukaera arte edo): bata neskena zen, eta Indaburua izeneko etxean zegoen (gaur egun museoa dena); bertzea mutikoena zen, eta hau gaur egungo eskola berean zen.
