Hasteko Eiheraldia etxaldera bisita
Apirilaren 5eko bestaren zati nagusia Agerraldi gelan iraganen bada ere, eguna etxalde bisita batekin abiatzea proposatu dute. Honela, larunbatean 10:30ean, Ugo Arbelbide laborari heletarrak bere etxaldearen ateak idekiko ditu. Familiako etxaldean plantatua, Ugok aitaren segida hartu zuen 2019an. Behi gorri hazkuntza alharen bidez eta belar bazkarekin kudeatzen du. Etxaldeko belarra alha aldizkatzeari esker balorizatzen du adibidez. Azken urte hauetan hesi frango ere landatu ditu pentze bazterretan. Ugok eta bere etxekoek EHLGren laguntza ukan dute, izan etxaldearen segida uzteko mementoan, laborantzan plantatzeko eta agroihangintza proiektua plantan emaiteko. Denei irekitako bisita izanen da eta elkarretaratzea Eiheraldia etxaldean berean eginen dute, Iholdiko bidean (D245), 10:30ean. Izen emaitea: 05 59 37 18 82 telefonoan.
Heletako plaza inguruan egitarau zabala
Egunak Heletako plazan segituko du, Agerraldi gelan eta bere inguruetan.12:00etan aperitifa izanen dute eta 13:30ean bazkari herrikoia, urtebetetze menuarekin (25 euro/eusko). Txartelak bertan salgai izanen dituzte, eguerditik goiti. Menuan, azalore salda, Kortsikako xerri-bular eta krutoinak hartz-baratxuri olioarekin, Oztibarreko axurki saltsakia eta sasoiko barazkia; ardi eta behi gasna; sagar konpota, krumble, sagar karamaletuak eta txokolate xuria ganache moduan. Herriko ogia, Irulegiko arno beltza, kafea eta ondokoa barne.
Bazkalondoan, 15:30ean, animazioak izanen dira familientzat: Herri kirolak (Gaia), makillajea (Pospolin), hazien inguruan tailerrak (Hazi Sarea) eta On Egin jokoa (EHLG). Arratsalde hondarrean aperitifa izanen dute Saltokak animaturik eta taloak Arberoa Ikastolaren eskutik. 20:00etan kontzertuak: Anari, Frikun, Kuartz eta DJ Infernu.