Ageri denez, atxiloketak joan den asteazkenean egin zituzten foruzainen kontrol batean furgoneta bat geldiarazi zutenean. Marihuana usain handia zuela eta, droga testa egin zioten gidariari, eta positiboa eman eta salaketa jarri zioten. Lau bidaiarien «urduritasuna ikusita» identifikatu egin zituzten. Furgoneta miatzen hasita, hainbat poltsa aurkitu zituzten produktuz beteak, baina bidaiariek ezin izan zuten haiek erosi izana justifikatu.
Gainera, alarmak saihesteko aluminioz forratutako poltsak eta motxilak aurkitu zituzten, eta maletategian tapakia zuen zulo bat ere, behar izanez gero gauzak gordetzeko. Kokaina eta marihuana kantitate batzuk ere konfiskatu zizkieten, eta salaketa administratiboa jarri zieten.
Horiek horrela, foruzainak Dantxarineko bi dendatako arduradunekin harremanetan jarri ziren, eta lapurtutako 73 objektuen (arropa eta lurrinak, batez ere) jabeak zirela baieztatu zieten foruzainei.
Atxilotuak Iruñera eraman zituzten, epailearen esku uzteko.
