Nere Bardako ametsa
Egilea: Sararar bat
Airea: Kattalin ttukuttu Kattalin arina
1
Larrunen arratsaldian izatu ondoan
Ametsetan ibili naiz bertze munduan
Gauaz lo nagolarik deskantsu onean
Ametsetan zeruan ta infernuan.
2
Solasean egon naiz han saratarrekin
Aspaldi harat joanak ziren arimekin
Atsegin zuten ni hau ikustearekin
Denek nahiz hemengo berriak han jakin.
3
Erran diotet nola den laster izanen
Burdin bide berri bat egina Larrunen
Mendia gora dela karroza iganen
Zaldirik gabe denak airos eramanen.
4
Kontrabandistak, guardak bai eta artzainak
Loriatuak hemen dagozila denak
Larrunen karroza hura ikusi nahiak
Hortan egiteko hor beren itzuliak.
5
Gero lezeaz ere nakote mintzatu
Kanpotarra nola den horrat abitu
Jaun Kastillak duela guzia beretu
Ustez hor behar duen orai aberastu.
6
Erran diotet horrat otomobiletan
Heldu dela jendea egun beroetan
Ongi goxo baita leze barne hortan
Berotzen duelarik bertze tokietan.
7
Suzko karroza hura zer zen ez baitzakiten
Holakorik ez baitzen lehen ikusten
Denak nere berriek zituzten harritzen
Ikustiaz mundua nola kanbiatzen.
8
Hortan akabatu da nere amets ona
Airoski ibilirik hedoietan barna
Zaldi eta karrozarik izain ez diona
Ibil dadila hola ahal eta maizena.