Lehiaketan 16 ganadutegi izanen dira eta guztira 151 zaldi abere lehiatuko dira hamahiru kategoriatan: Behorrak kumerik gabe, behorrak kumeekin eta zaldiak. Gainera, sari berezi bat emanen zaio azokako zaldirik onenari.
08:00etatik 08:30era sartuko dituzte zaldi abereak barrutian. 09:00etatik 14:30era lehiaketa, sailkapen-erronda eta kategorien araberako sari banaketa eginen dute. 14:30ean lehiaketako buru onenari saria emanen zaio. 10:00etatik 15:00etara artisau azoka ere izanen da.
Urrezko aizkolariak eta harri-jasotzaileak
Egun horretan berean, gainera, 2024ko Urrezko Aizkolari txapeldunen liga Eusko Label Saria izanen da Urdazubin. Iker Vicente, Mikel Larrañagaren kontra lehiatuko da herriko frontoian, jokoan dauden bi puntuen bila. Igandean 17:00etan hasiko da norgehiagoka handia eta aizkolariez gain, harri-jasotzaileak ere izanen dira. Emakumezkoetan, Garazi Ansa eta Estefania Etxebeste arituko dira eta, gizonezkoetan, Imanol Royo Lartain eta Jokin Eizmendi.
Bistan da urriaren 6an izanen dela zer ikusi herrian, goizean animaliekin eta arratsaldean punta puntako kirolariekin. Gainera, egun osoan animazioak, musika eta monasterioa, errota, Trikuharry animalien aterpea, Ikaburuko lezeak eta herriko jatetxeetan zaldi mendua dastatzeko aukera izanen dira, bisitarien esku.
