Urte olinpiko orotan bezala, Frantziako federazio, liga eta komite guzietako buruzagien agintaldiak bukatuak dira eta hauteskunde berriak eskatzen dituzte. Euskal pilotaren munduan, lau hauteskunde iraganen dira, irailean Iparraldeko Pilota Batzorderako hauteskundeak edin dituzte, urrian 64 Departamenduko Batzordekoak, azaroan Akitania Berriko Pilota Ligakoak eta abenduan Frantziako Euskal Pilota Federakuntzako hauteskundeak eginen dituzte.
Henri Errandonearen taldea, Iparraldeko Pilota Batzorderako hautagai bakarra izan da, Iparraldeko pilota elkarteen bozen % 95ekin hautatua izan da.
Pilota elkarteen laguntza osoa ukan du Errandoneak, azken zortzi urteetan egindako lanaren emaitza.
Henri Errandonea, zortzi urtez idazkari nagusi, orain lehendakari
Zortzi urtez Iparraldeko Pilota batzordeko idazkari nagusi izan ondoan, Henri Errandonea komitearen buru da, talde berritu eta gaztetu batekin. Borondatezko engaiamendu eta talde trebe bati esker, lehendakari berriak 2016an Jean-Michel Garayar aitzineko lehendakariarekin egin zuen bideari segituko dio. Elkarlan ikuspegi bat, etengabeko gogoetan jartzea, eztabaida eta partekatze borondate bat izanen dira talde berri horren kausitzeko baldintzak, Iparraldean pilotari merezi duen lekua eta irudia ematea izanen delarik xedea.
Iparraldeko pilota batzordea zuzentzen duen talde berria 22 pilota elkartetako 32 kidek osatzen dute, eta horietatik 6 emazte dira, 12 kide berriak. Boluntariotzaren krisia handia izan arren, talde honek pilota joko ezberdinetako adituak biltzen ditu eta boluntarioek indartuko dute
Lilou Etxeberria FFPBko presidentearen eta Esku Pilota berezko pilotarien elkartearen jarrerak salatu ditu berriki Iparraldeko Pilota Batzordeak. Henri Errandonearen irudiz, «pilotan, gauzak hobetzeko, arduradunak aldatu behar dira». Frantziako Pilotako Federazioko bozak, hain zuzen, abenduan iraganen dira.