Nafarroako Gobernuko Kultura Zuzendaritza Nagusiak (Vianako Printzea erakundea) antolatutako Kultur programaren 29. edizioak kultura eskaintza zabala ekarri du aurten ere gure eskualdera. Uztailaren 27an, larunbatean 12:00etan Bazkun Proiektuak taldeak Eguzkilore, jazz mitologikoa kontzertua joko du Zugarramurdiko leizean.
Honekin lotuta, oinez egiteko ibilbidea eta gaztandegi batean dastaketa izanen dute goizean. 09:00etan abiatuko dira Azketa frontoiko aparkalekutik. Izen-ematea eta informazioa: info@orbela-beintza.com (20 euro).
Bien bitartean, Kultur 2024 programaren barrenean Bertizen María Jimenez Moreno Iruñeko artistaren Basati-Salvaje erakusketa ikusgai dute uztailaren 1etik abuztuaren 31ra, aldian aldiko bertze zenbait ekitaldirekin batera.
