22 kilometro luze eta 1.600 metroko desnibel positiboa duen Sara Korrika Trailen parte hartzeko izena eman zuten 618 kirolarietatik 590ek lortu zuten helmugara ailegatzea igandean. Horien artean, Idiazabalgo Josu Urrestarazu Garcia izan zen bizkorrena (2.05.07) eta Esclops D’Azun talde frantziarreko Adrien Astle (2.06.09) eta Romain Lacaste (2.07.05) izan zituen lagun podiumean. Hodei Lujanbio goizuetarra laugarren izan zen (2.08.41). 2016an Oier Ariznabarretak egin zuen proba honen errekorra (1.51.21).
Lehen emaztea Oihana Azkorbebeitia izan zen (2.35.24), Larraitz Etxebeste bigarren (2.36.00) eta Sarah Dinclaux hirugarren (2.41.00). Oihana Kortazarrek egin zuen emaztekien errekorra 2016an (2.18.37).
Denek opariak izan zituzten eta Lur Berri gelan talo eta edateko ausarki. Sara Korrika Elkarteak denak eskertu zituen, bai bere kideak baita borondate oneko guziak ere.
Kilometro bertikala bezperan
Joan den urtean bezala, bezperan, larunbat arratsaldearekin, Sara Korrika bertikala egin zuten, 4,5 kilometro luze eta 800 metroko desnibel positiboan duen proba. 64 korrikalarik hartu zuten parte. Emakumeetan, joan den urtean bezala, Iruñeko Maria Ordoñez izan zen lehena (41.29), bigarren Maud Combarieu (42.16) eta hirugarren Rebeca Mariño (45.14).
Gizonezkoetan lehena, Ascain Elgarrekin taldeko Thibaut Bertrand izan zen (34.35), bigarren, segundo bakarrera, Txurregi taldeko Mikel Beunza (34.36) eta hirugarren Ascain Elgarrekin taldeko Damian San Martin (35.14).