Duela bortz urte, Franck Dolosor Senpereko kazetariak euskaraz sorturiko Estitxu dokumentala, plazer handiarekin ikusi genuen. Oraingoan frantsesez itzulirik aurkeztuko du, publiko zabalago bati erakusteko gisan. Urtarrilaren 11n, ortzegunean 19:30ean izanen da emanaldia Larreko kultur gunean, urririk.
Estitxu kantariaren ahots xoragarria duela 30 urte isildu zen. Beskoitzeko erresinulak utzi du bere izena Baiona eta Bilboko karrika banari, baita Seaskak Baionan duen kolegioari ere.
Estitxu kantari aitzindaria izan zen gitarrarekin bakarlari moduan kantatzen baitzuen euskaraz eta gaztelaniaz. Publikoaren miresmena sortu zuen eta ukan dituen aipamenak ez dira bakarrik musika munduan gelditu.
Ortzeguneko emanaldia Estitxuren berpizte bat bezala har dezagun gure memorian.
Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.