Ortziralean Hazparnen aritu zen Sarako Karlos Aizpuruak, Haira Aizpuruak, Ellande Alfarok eta Etxalarko Etxahun Azkarragak osaturiko Lizaieta taldea. Hazparneko Hazparke taldearen kontra aritu ziren, eta 60 bat lagun bertaratu ziren saioa ikustera. Azkenerako, Lizaieta taldeak galdu zuen. Lehen saioa irabazita, asteburu honetako emaitzen esperoan egon beharko dute hurrengo fasera sailkatzen diren ikusteko.
Lesakako Maddi Ane Txoperena eta Josu Txoperena ari diren Ipiñitzeko bertsuak taldeak, aldiz, igandean izan zuen saioa Baionan, bertako 3 kasko taldearen kontra. Biltxoko elkartea goraino bete zen bertso saioa aditzeko, eta Ipiñitzeko bertsuak taldea nagusitu zen. Hala ere, lehiatik kanpo gelditu dira jada.
Asteburu honetan jokatuko dute ligaxka faseko azken saioa, eta horren ondotik jakinen da zein lau talde ariko diren hurrengo fasean. Finalerdiak urriaren 28an Muskildin eta azaroaren 4an izanen dira Azkainen eta finala, aldiz, azaroaren 18an Aiherran.