Urdazubiko Ikaburuko Lezearen Egunaren bederatzigarren edizioa ospatu dute uztailaren 15ean. Larunbatean, egun osoan hainbat ekitaldi izan dira. Historiaurreko bizitza-tekniken erakustaldia (sua egitea, jaurtiketak…) eta tailerra egin du Iñaki Libano, Edestiaurre Arkeologia Elkarteko presidenteak. Zehazki, duela 400.000 urte bezala sua egin zuten, su hori argi-zuzi eta lastargietara eraman eta horrekin argitu zuten lezerako bidea. Bisonte baten grabatua ere aitzinako teknikak erabiliz egin zuten eta Ikaburuko lezea bisitatu zuten. Argazkiak: Juan Mari Ondikol
Goio Hualde, lezeko arduradunak aipatu zuenez, «urtean 35.000 bat lagunek bisitatzen eta ezagutzen dute lezea, baina udan, sanferminak pasatu arte ez da egiazko martxa hasten». Beraz, hemendik irailera espero dituzte bisitari gehienak.
Txalaparta erakustaldia ere egin zuten lezearen sarreran, baita magia saioa eta ekoizleen produktuen erakusketa ere. Taloak dastatzeko modua ere izan zuten bisitariek eta Ikaburuko lezearen eguna borobiltzeko, bertako produktuen saski baten zozketa ere egin zuten.