Zozketaz gain, puzgarriak eta musika, euskal dantzak, sagardoa eta txorizo pintxoak eta herri kirol erakustaldia ere izan zituzten. Larretxea anaien eskutik, aizkolariak, harri altxatzaileak eta txinga eramaileak aritu ziren.
Historia
Mendekoste eguna 1940. hamarkadakoa da, Bigarren Mundu Gerra pasatu ondotik, mugak zenbait urtez itxita gelditu zirenean. Muga soilik Mendekoste astelehenean irekitzen zen eta egun horretan Dantxarinean, mugako bi aldeetako familiak biltzeko aukera zuten.
Besta egun handia zen, salmenta tokiak haien produktuak karrikara ateratzen zituzten eta musika, dantzak eta pilota partidak izaten ziren. Mugako bi aldeetatik jendez betetako autobusak etortzen ziren, egun batez haien familiekin eta lagunekin elkartzeko asmoz. Urteen poderioz, eta mugak irekiak zeudela, besta hau ospatzeari utzi zioten duela 40 bat urte.
Orain, Dantxarineko merkatarien elkarteak besta hau berreskuratu du eta dagoeneko hamargarren edizioa ospatuko du aurten.