Herriko trikitilarien soinuarekin hasi ziren bestak, asteazken arratseko txupinazoarekin eta txartelen zozketaren sarituekin akitu zen, igande arratsean. Aurten, berrikuntza gehienak pilota munduari lotuta egon ziren: ortzirale arratsaldean herriko pilotari gazteek partidak jokatu baitzituzten. Gainera, igande arratsaldean ere pilota partida polita izan zen: Xala eta Pascual, Mikel Goñi eta Azanzaren kontra aritu baitziren. Irabazleak Xala eta Pascual izan ziren, partida estuaren ondotik.
Otorduetan jende andana
Urteroko gisan, otorduetan ere jende andana bildu zen. Paella jatean 100 pertsona inguru bildu ziren eta zikiroan 300 inguru. Musikaz alaiturik, herritar guztiak biltzeko parada bikaina izan zen, giro bikainean. Gazteez gain, haurrek ere aski ongi pasatu zuten puzgarri eta jokoetan, argazkian ikusten ahal den moduan.
Zozketa
Zozketaren sarituak ere atera ziren. Lehen saria 5719 zenbakiak eraman zuen, bigarrena 5537 zenbakiak eta hirugarrena, azkenik, 6594 zenbakiak. Saridunak herriko bestetako komitearekin kontaktuan paratu behar dira saria hartzeko.
Bestak akituta biltze lanekin ere aritu dira, gauza guztiak bildu eta heldu den urteko besten esperoan gelditzea bertzerik ez da gelditzen. Aurtengoak behintzat ederki profitatuak gelditu dira!