Aitor Sarasua bertsopaper lehiaketan saritu dute Unax Aizpurua saratarra

Maila nagusian Iñigo Legorburu errenteriarrak lortu ditu lehen bi sariak Bizitzari ten/k eta Gelako azkena bertso sortekin. Hirugarren saria, aldiz Manu Goiogana irundarrarentzako izan da Konektatu sortagatik. 

Gazteen mailan, aldiz, Goizane Etxeberriri eman diote  lehen saria  Euskal Herria sortarekin, Pagoa Bidartentzat izan da bigarren saria Nire altxorra lanagatik eta Eriet Zubizarretarentzat hirugarrena Ene Maite kuttuna izeneko bertsoengatik.

Hiru sariez gain, epaimahaiak kategoria horretan Unax Aizpuruari sari «gorena» ematea deliberatu du. Bertsularien Lagunak elkarteak jakinarazi duenez, «komunikazio akats batengatik antolakuntzak ez zituen bertso sorta guziak epaimahaiaren esku utzi eta gazte sailean Unax Aizpurua Ibargarairena epaitu gabe gelditu zen. Epaimahaiak sorta guziak kontuan hartuz Unaxen sorta onena dela onartu du. Sariak jadanik banatuak izanik gazteen sailean ez dugu aldaketarik eginen baina, Unax Aizpurua Ibargarairi saririk gorena aitortzen diogu». Halaber, barkamena eskatu diete parte hartzaile guztiei. 

Sari banaketa apirilaren 23an iraganen da Bertsularien Lagunak elkarteak Ziburuko Baltsan elkartean antolatu duen bertsu bazkarian. Bertan, Maialen Lujanbio eta Iker Zubeldia arituko dira bertsotan.