Oronoz eta Goienetxe saratarrek irabazi dute Laboral Kutxa Masterra pilota goxoarekin

Ttipi-Ttapa 2023ko mar. 20a, 12:00
Anie Oronoz eta Marie Goienetxe saratarrek irabazi dute Laboral Kutxa Masterra senior mailan pilota goxoarekin.

Laboral Kutxa Masterrak baditu dagoeneko bere lehen txapeldunak Arrigoarriagan igandean jokatutako jardunaldi eder baten ondotik. Sarako Ania Oronozek eta Marie Goienetxek (senior mailako pilota goxoan), Gordonek eta Betegik (gazteen pilota mistoa) eta Etxegaraik eta Zabalak (lehen mailako pilota mistoa) jantzi dituzte Master Laboral Kutxaren lehen txapelak.

Pilota goxoarekin, Ania Oronoz eta Marie Goienetxeren ahaleginak eta indarrak txapelak Sarara eraman ditu, finalean Etxaniz eta Aramendi bezalako bi espezialista gaindituz. Jaialdiko lehen finala gogorra izan da, piloteatua, ordubete baino gehiago iraun du eta markagailuan gorabeherak etengabeak izan dira hamarna berdindu duten arte. Une horretatik aitzinera, Sarako bikoteak ihes egin du markagailuan, garaipena nagusitasunez eskuratzeko (12-18). 

Gazteen pilota mistoan, Gordon-Betegi lehiakor atera dira hasieratik, eta garaipen sendoa lortu dute (22-14). Biliyak errioxarrak txapelketa bikaina jokatu du, baina finalean ez da ezkerrarekin fin ibili, pilota dezente huts egin ditu eta hortik egin die ihes partidaren zati handi batek Gisasola-Bilyaki. 

Eta lehen mailako pilota mistoan, Etxegarai eta Zabala Beitia eta Bergara baino askoz gehiago izan dira, txapel preziatuak (11-22) bururatzeko. Txapeldunek erakutsitako fidagarritasunaren aurrean, Beitiak nahiko partida diskretua egin du, eta Bergarak ez du bere egunik onena izan eta erraztasun dezente eman ditu. 

Igandean Arrigorriagan jokatutako finalistak, antolatzaile eta sari-emaileekin batera, txapelak eta garaikurrak banatu ondotik.

Elite malako finala datorren igandean Zarautzen

Atzoko hiru finalen ondotik, aurtengo binakako Laboral Kutxa Masterrari bere egunik garrantzitsuena baino ez zaio gelditzen, datorren igandean Zarauzko Aritzbatalde pilotalekuan jokatuko den elite mailako finalarena. Final hau martxoaren 22an, asteazken arratsaldean aurkeztuko dute Zarauzko malekoian.

 

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun