Min hartuta dagoen Iker Vicentek ez zuen parte hartzerik izan azkenean, baina herri kirol besta handia izan zuten abenduaren 8an Urdazubin. Urrezko Aizkolari Kopako kanporaketan Hodei Ezpeletak lortu zuen finalerako txartela, Julen Gabirondo eta Julen Larrea gibelean utzita.
Bikotekako harri-jasotze lehia estua izan zen eta ehun kiloko aldea bertzerik ez zen izan Goenatxo III.a-Izeta IV.a eta Guzta-Olaizola bikoteen artean. Jasoaldi kopuru berdina egin zuten, 104na, baina Goenatxok eta Izetak 11.725 kilo jaso zituzten eta Guzta eta Olaizoak 11.625.
Lau kiroletan egindako emakumeen herri kirol txapelketan Larrun taldea (Xanta Sousa, Patricia Martin, Maika Ariztegi eta Nerea Sorondo) nagusitu zitzaion Oiz taldeari (Ane Fernandez, Karmele Gisasola Zelai III.a, Garazi Arruti eta Uxue Ansorregi).
Hiru txandetan 25 kiloko txingekin hamabi plaza, 63 kiloko harriari hamar jasoaldi, 9 kiloko ingudearekin 50 jasoaldi eta aizkorarekin 36 ontzako enborra moztu behar izan zuten eta Larrungoek 18 minutu eta 39 segundo behar izan zituzten eta Oizkoek 19 minutu eta 38 segundo.